Dështon projekti 6 mln USD i “Gjoka Construction”, rrjeti i ujësjellësit të Peshkopisë jashtë funksionit, përfundoi vetëm 3 muaj më parë

I përfunduar vetëm tre muaj më parë, projekti i kompanisë “Gjoka Construction” për tubacionin e ri të ujësjellësit në Dibër, që ka kushtuar rreth 6 milionë dollarë, ka dalë jashtë funksionit.

Rrjeti kryesor i këtij ujësjellësi është dëmtuar në fshatin Zimur të qytetit të Peshkopisë, për shkak të shembjes së rrugës, dhe aktualisht ndodhet jashtë funksionit. Kjo ka detyruar banorët e Peshkopisë që të furnizohen me ujë nga rrjeti i vjetër i ujësjellësit, i cili nuk është i sigurt për konsum.

Përfaqësues të ujësjellësit të Peshkopisë thanë se është tentuar të shkohet në fshatin Zimur për riparimin e defektit, por një gjë e tillë ka qenë e pamundur, për shkak të motit të keq dhe trashësisë së madhe të dëborës në zonë.

Banorët kanë pasur ankesa herë pas here për punimet e këtij rrjeti ujësjellësi. News24 kontaktoi me prefektin, me drejtorin e Ujësjellësit, me përfaqësues të bashkisë, por nuk pranojnë të japin asnjë informacion. Burime të sigurta bëjnë me dije se tubacioni është prishur afër veprës së marrjes, pasi punimet nuk janë bërë cilësore.