Protesta e 12 nëntorit në median britanike/ Daily Mail: Mijëra shqiptarë në rrugët Tiranës demonstruan kundër qeverisë Rama: Na kthyet në popull gomonesh

Protesta e një dite më parë përpara Kryeministrisë ka bërë jehonë në mediat e huaja. Kauzat por edhe një prej simbolikave të protestës, gomonia që përfaqësonte shpopullimin e Shqipërisë, nuk i ka shpëtuar mediave britanike.

Daily Mail shkruan se mijëra njerëz u mblodhën dje përpara zyrës së kryeministrit Edi Rama, të thirrur nga ish-kryeministri Sali Berisha.

Shkrimi i Daily Mail:

Të thirrur nga Sali Berisha, kreu i opozitës, ata u mblodhën jashtë zyrës së zotit Rama për të protestuar kundër korrupsionit të dyshuar të qeverisë dhe rritjes së kostos së karburantit dhe ushqimit.

Në një fjalim para turmës, zoti Berisha tha se Rama ishte fajtori për largimin masiv të të rinjve nga Shqipëria, gjë që e ka lënë Britaninë përballë valëve të emigracionit të paligjshëm.

Ish-kryeministri dhe kreu i Partisë Demokratike pretendoi se bota tani ‘na sheh si njerëz gomone’ pasi rreth 12,000 shqiptarë kaluan Kanalin me gomone këtë vit.

“Shqiptarët sot janë një popull gomonesh”, deklaroi ai, “sepse dikush – dhe ky është Edi Rama – ua grabiti votën, i ktheu liritë e tyre në iluzion, në një votë fiktive, vetëm që të qëndronte në pushtet. ‘

Në fillim të këtij muaji zoti Rama akuzoi qeverinë britanike për diskriminim ndaj shqiptarëve për të shkëputur vëmendjen nga ‘dështimet e saj politike’.

Ndërsa marshonin nëpër Tiranë, protestuesit mbanin një gomone me flamuj britanikë dhe shqiptarë për të ‘shprehur shqetësimin e tyre për eksodin masiv’ të të rinjve.

Deri në 1,200 oficerë policie, shumë me mjete të plota për protestat, u vendosën për të kontrolluar turmat e shumta, pohuan raportet lokale. Megjithatë, disa demonstrues thyen kordonët e policisë për të goditur me shkelma dhe hedhur bojë në derën e kryeministrisë.