Hiqen dyert e blinduara dhe qirinjtë, lahet boja nga muret! Një ditë pas protestës, ç’po ndodh tek Kryeministria!

Një ditë pas protestës së thirrur nga ish-kryeministri Sali Berisha, duket se çdo gjë është kthyer në normalitet në bulevardin përpara zyrës së kreut të qeverisë.

Siç shihet nga pamjet, punonjësit e Kryeministrisë kanë hequr dyert e blinduara, të cilat ishin vendosur një ditë më parë si masë sigurie në rast të përshkallëzimit të protestës.

Tubimi i djeshëm u shoqërua me incidente të vogla, ku pas përfundimit të fjalimeve, qytetarët çanë kordonin e sigurisë së policisë për të ndezur qirinj tek hyrja e Kryeministrisë.

Kishte edhe nga ata protestues që goditën me shkelma dhe grushte dyert e blinduara. Madje një prej protestuesve u ndalua nga policia, pasi sipas tyre, kishte nxjerrë një thikë dhe po bënte lëvizje të pakontrolluara.

Protestuesit hodhën dhe bojë të kuqe e të zezë në muret e Kryeministrisë. Një ditë më pas, asgjë prej tyre nuk ka mbetur.

Qirinjtë janë larguar, ndërsa boja në mure është larë menjëherë. Ndërkohë në oborrin në krah të Kryeministrisë mungon një “simbol” i kësaj godine, kërpudha që e ka vendosur Edi Rama.

Përpara çdo tubimi, autoritetet e largojnë kërpudhën pasi në raste të mëparshme, qytetarët e kanë shkatërruar.